Mayad Tharo Wo Put Kathe Bhajan Lyrics

मायड़ थारो वो पूत कठे लिरिक्स 

हल्दी घाटी में समर लड्यो वो चेतक रो असवार कठे 
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

मै बांच्यो है इतिहाशा में मायड़ थे ऐड़ा पूत जण्या 
थन बान लजायो नी थारो रणधीरा वे सरदार बण्या
बैरया रे मन स्यूं बाटिला सारा पड़ग्या उण रे आगे 
वो झुक्यो नहीं नर ना हारियो अकबर री सेना के आगे 

हिंदवा सूरज मेवाड़ रतन वो महाराणा प्रताप कठे
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

हल्दी घाटी रे टीला स्यूं शिव पार्वती युद्ध देख रया 
मेवाड़ी वीरा री ताकत अपणी नज़रों स्यूं तोल रया
बोल्या शिव जी सुण पार्वती मेवाड़ भोम री बलहारी 
जो आछ्या कर्म करे जग में वो अठ जनम ले नर नारी 

स्वम एकलिंग रूप धरी बर्षा स्यूं बैठो भला अठ
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

या माटी हल्दी घाटी री लागे केसर और चन्दन है 
माथा पर तिलक करो इण रो इण धरती ने नित वंदन है
या रण भूमि तीरथ भूमि दर्शन करवा मन ललचावे 
उण वीर सुरमा री यादां हिवड़ा में जोश जगा जावे 

उण स्वामि भक्त चेतक री टापा, टप टप री आवाज कठे
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

भाई शक्ति बैरया स्यूं मिल भाई स्यूं लड़बा ने आयो 
राणा रो भायड़ देख देख शक्ति सिंह भी है शरमायो
ओ नीला घोडा रा अशवार थे रुक जाओ थे रुक जाओ 
चरणा में आय पड्यो शक्ति बोल्यो रो कर मैं तो पछतायो 

ओ गळे मिल्या भाई भाई ज्यूँ राम भरत रो मिलण अठे
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

संकट रा दिन देख्या जतरा वे आज कुण देख पावेला 
राणा रा बेटा बेटी वे रोटी घास री खावेला
ले संकट ने वरदान समझ वो आजादी को रखवाळो 
मेवाड़ भोम री पत राखण वो कदे भला ना झुकवा वाळो 

चरणों में धन रो ढेर कियो दानी भामाशा प्रताप कठे
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

मानवता रा धर्म निभायो है भेद भाव ना जाण्यो है 
सेना नायक सूरी हकिम भी यूँ राणा पुजवायो है
जात पात और ऊंच नीच री बात हिया नहीं भाई 
उण वास्ते राणा री प्रभुता जग ने सरहाई 

ओ सम्प्रदाय सदभाव री मिले है मिशाल आज कठे
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

कुम्भलगढ़ गोगुन्दा चावंड हल्दीघाटी और कोल्यारी 
मेवाड़ भोम रा तीरथ है राणा प्रताप री बलहारी
कहे हरिद्वार, काशी, मधुरा, पुष्कर गलता में स्नान करां 
सब तीर्था रा फल मिल ज्यासी मेवाड़ भोम में जद बिचारा 

कवी माधव नमन करे शत शत मोती नगरी आज अठे 
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

आज देश री सीमा पर संकट रा बादळ मंडराया
पाकिस्तानी घुसपेथ्या भारत सीमा में घुश आया
भारत रा वीर जवान अठे बाने वो सबक शिखा दीज्यो 
थे हो प्रताप रा ही वंशज बाने आ बात बता दीज्यो 

ओ कश्मीर भारत को है कुण आँख दिखाव आज अठे
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

हळदी घाटी में समर लड्यो वो चेतक रो असवार कठे 
मायड़ थारो वो पूत कठे वो एकलिंग दीवान कठे 
वो महाराणा प्रताप कठे…

वो महाराणा प्रताप कठे…
वो महाराणा प्रताप कठे…
वो महाराणा प्रताप कठे…
वो महाराणा प्रताप कठे…

समाप्त ( End) 

 बोल ( Lyrics) ट्रॅडिशनल 
गायक ( Singer) : प्रकाश माली 

• प्रकाश माली ( Prakash Mali)